Құрметті батысқазақстандықтар!
Бүгін біз Ұлы Жеңістің жетпіс жетінші көктемін қарсылап отырмыз. 9 мамыр — аға ұрпақтың жанқиярлық ерлігі мен асқақ рухын əйгілейтін, қаһармандарға құрмет көрсетіп, боздақтардың рухына тағзым ететін мəні зор мейрам, қастерлі күн.
Отан үшін от кешкендердің қатарында 76 мыңнан астам батысқазақстандық болды. Олардың жартысына жуығы жан алысып, жан беріскен шайқастарда шейіт болды. «Айдаһар болып майдан жұтып жатты, ата мен немеренің аралығын» деп Қадыр ағамыз жырлағандай, сұрапыл жылдары жаны жараланбаған жанұя жоқ шығар… Ал майданға жақын орналасқан өңірдің оңтүстік аудандары үшін соғыс зардабы тым ауыр болды.
Жеңісті жақындатқан жерлестерімізге, арамызда жүрген ардагер аға-апаларымыз бен тыл еңбеккерлеріне зор денсаулық, айналасына амандық тілейміз. Ұрпаққа ұран-үлгі болып, ұзақ жасасын деп дұға етеміз. Бейбіт өмірді қорғау жолында шейіт болған боздақтардың рухына мəңгілік тағзым етеміз!
Ардақты ақжайықтықтар!
Екінші дүниежүзілік соғысқа қатысқан қаһармандардың ерлігін ұмытуға қақымыз жоқ. Бұл — тарих. Өткеннен өнеге алып, аталар аманатына адал болайық! Енді ешқашан ел іргесі сөгілмесін, ер тізесі бүгілмесін! Бейбіт күніміз баянды болғай! Ұлы Жеңіс күні құтты болсын!
Құрметпен, Батыс Қазақстан облысы Қоғамдық кеңесінің төрағасы Ербол Ғұмарұлы Салықов.
