Мемлекеттік қызмет – мәртебелі міндет. Ал мемлекеттік қызметші — мемлекеттің айнасы. Жоғары лауазымды тұлғадан бастап қатардағы қызметкердің жүріс-тұрысы, іс-әрекеті мен мінез-құлқы тұтастай алғанда мемлекеттік қызметтің имиджіне тікелей әсер етеді. Сондықтан, еңбек жолы осы салада өрілген әрбір адамның жауапкершілік жүгін жете сезінгені абзал. Осы орайда өңірде мемлекеттік қызмет саласында жемісті еңбек етіп, бай тәжірибе жинақтаған аға буын өкілдерінің жергілікті атқарушы құрылым қызметкерлерімен кездесулері ұйымдастырылып жатыр. Сондай іс-шараның бірінде БҚО Қоғамдық кеңесінің төрағасы Ербол Салықов мемлекеттік қызметшілермен кездесіп, дәріс оқыды. Атап айтқанда облыстық энергетика және тұрғын үй-коммуналдық шаруашылығы басқармасы, облыстық жолаушылар көлігі және автомобиль жолдары басқармасы, облыстық құрылыс басқармасы, облыстық жер қатынастары басқармасы, облыстық мемлекеттік сәулет және құрылыс қадағалау басқармасы, облыстық мемлекеттік сатып алу басқармасы, облыстық кәсіпкерлік және индустриалды-инновациялық даму басқармасының ұжымы алдында еңбек жолынан жан-жақты мысалдар келтіре отырып, өмір тәжірибесімен бөлісті.
Өмірінің отыз жылға жуық уақытын мемлекеттік салаға арнаған Ербол Ғұмарұлы сөз басында өзінің қанатын қатайтып, бағыт-бағдар берген тұлғалардың тәлімі мен тағылымын тілге тиек етті. «Замана дидары қалай құбылса да, мемлекеттік қызметшілерге, жалпы әрбір азаматқа қойылатын басты талап өзгермейді, ол – тәрбие. Тәрбие ұшқан ұяда, өскен ортада қалыптасып, ұжымда беки түсуі керек. Біреудің ала жібін аттамау, адалдық туын жықпай еңбек ету – әрқайсымыздың құбылмайтын қағидамызға айналуы керек. Адалдық жүрген жерде адамдық жүреді. Ал ала жіпті аттамағанның абыройы аласармайды», — деді Ербол Ғұмарұлы. Ол қоғамның дертіне айналған жемқорлықты жеңу жолындағы шешуші фактор адамның сана-сезімі, бойға жиған тәрбиесі екеніне ерекше тоқталды. «Қытайдағыдай қатаң жаза ғана «жегіқұртты» жоюдың жалғыз жолы болса аспан асты елінде ардан аттайтын адам қалмас еді… Мәселе – әр адамның тұлғалық қасиетінде, тәрбиесінде дер едім. «Бір құмалақ бір қарын майды шірітеді» демекші, мемлекеттік қызметтің атына кір келтіретін бірен-саран азаматтар үшін тұтастай салаға деген қоғамның көзқарасы қалыптасып жатыр. Баршаңызға жауапкершілік жүгін жіті сезініп, абыройлы қызмет етулеріңізге тілекшімін», — деп түйіндеді Ербол Ғұмарұлы.
Кездесу барысында облыстық Қоғамдық кеңестің жұмысы жөнінде де жан-жақты ақпарат берілді. Консультативтік-кеңесші, байқаушы құрылымның бастамасымен мемлекеттік қызмет сапасына жүргізілген мониторинг қорытындысы айтылып, кей салалардағы «әттеген-айлар» да сөз болды.
