Жергілікті мәслихаттың «2022-2024 жылдарға арналған өңірлік бюджет туралы» шешіміне өзгерістер енгізу жөніндегі хабарлама тыңдалған отырыста облыстық Қоғамдық кеңестің мүшесі Ескендір Елемесов осылай деді. Оның айтуынша, бүгінгі таңда атаулы әлеуметтік көмекті алушылардың барлығы бірдей шынайы мұқтаж жандар емес.
– Тепсе темір үзетін азаматтар да атаулы әлеуметтік көмек алуды ар санамайды, жұмыс істеуден қашады. Президенттің өзі кешегі құрылтайда балаларды жастайынан еңбекпен тәрбиелеу туралы айтып жатыр. Масылдық психологиядан арылмаған ата-ана ұл-қызына еңбексүйгіштікті қалай үйретеді. Атаулы әлеуметтік көмекті мүмкіндігі шектеулі жандар, көп балалы отбасылар, жалпы шынайы мұқтаж жандар алуы керек. Алушылар тізбесі заңнамалық тұрғыда қайта нақтылауды қажет етеді деп ойлаймын, – деді Ескендір Кафарұлы.
БҚО Қоғамдық кеңесінің төрағасы Ербол Ғұмарұлы әлеуметтік көмектер туралы толық ақпаратпен танысып, мәселені жан-жақты талқылау үшін облыстық жұмыспен қамтуды үйлестіру және әлеуметтік бағдарламалар басқармасы басшылығын алдағы отырыстарда бірлесе жұмыстануға шақырды.
Айта кетейік, биыл аймақта атаулы әлеуметтік көмек төлемдері үшін республикалық бюджеттен 1 млрд 879 млн теңге қаржы бөлінген.
