Бүгін Орал қаласындағы мамандандырылған халыққа қызмет көрсету орталығында өткізілген қоғамдық бақылау іс-шарасында қоғам өкілдері тарапынан осындай ұсыныс айтылды. «Өңірдегі елуден астам автомектептің арасында курсанттарының көрсеткіші жағынан қандай нəтиже бар? Біздің ойымызша, түлектердің теориялық жəне тəжірибелік емтихандағы қорытындылары бойынша автомектептердің де деңгейін салыстыру қажет. Бұл жеке мектептердің жауапкершілігін күшейтеді», – дейді мониторинг тобының мүшелері.
Қоғамдық бақылау іс-шарасына ҚР Мемлекеттік қызмет істері Агенттігінің БҚО бойынша департаменті басшысының орынбасары Аманқос Жұбаныш, облыстық ақпараттандыру, мемлекеттік көрсетілетін қызметтер жəне архивтер басқармасы басшысының орынбасары Абат Ашық, облыстық қоғамдық кеңестің мүшесі Біржан Кухаев, «БҚО мүгедектері ерікті қоғамы» ҚБ Орал қаласы бойынша филиалының төрағасы Ерген Бекарыстанов қатысты. Мониторинг тобының мүшелері осыған дейін берілген ұсынбаларға байланысты қолға алынған жұмыстарға зер салды. Мамандандырылған орталық директоры Луиза Құсайынова мемлекеттік қызметтердің көрсетілу барысын егжей-тегжейлі баяндап берді. Мониторинг қорытындысы бойынша автоматтандырылған алаңды көлікпен жəне арнайы құрал-жабдықтармен толық əрі іркіліссіз қамтамасыз ету туралы ұсыныс берілді.
