Елдегі көшбасшы қоғамдық бірлестіктің құрылтайында қабылданған сайлауалды бағдарламаны өте өзекті мәселелерге ерекше екпін түсірген маңызды құжат деп қабылдадым. Олай болуы заңды да. Өйткені, съез кезінде ҚР Тұңғыш Президенті — Елбасы, Партия Төрағасы Нұрсұлтан Әбішұлы айтқандай, əр аймақ, əр аудан, əр ауыл-елдімекеннің мұң-мұқтажы жеке дара ескерілген жергілікті бағдарламалар бұрын-соңды болған жоқ. Айталық, құрылтай қарсаңындағы конференцияларда еліміздің барлық аймағындағы жергілікті мəселелерді жіпке тізіп, арнайы жоспар түзген 216 өңірлік жаңа сайлауалды бағдарлама қабылданды. Ірілі-ұсақты бағдарламаларды негізге ала отырып, республикалық құжат дайындалды. Демек, бас партияның бесжылдық бағдарламасында тек нұротандықтардың емес, тұтас елдің пікірі ескерілді деуге негіз бар.
Өзіміздің өңірге қатысты өзекті мəселе — Жайық өзенінің қазіргі жай-күйі. Мұны қоғамдық кеңестің отырыстарында да бірнеше рет көтергенімізбен, қолымыз қысқа болып отыр… Мемлекет басшысы «Өзгерістер жолы: Əр азаматқа лайықты өмір» атты бағдарламаның басымдықтарына тоқталғанда, бұл мəселені де ерекше атап өтті. Жайық өзені алабының экологиялық жүйесін сауықтыру жөнінде шаралар қабылданатынын айтып, партияның сайлауалды уəдесін берді.
Партияның нақты іс-қимыл жоспарына сəйкес, алдағы бес жылда əр ауылға дейінгі барлық жол, яғни 27 мың шақырым жол жөнделеді. 3,5 мыңнан астам ауыл жаңғыртылады. Ауылдардың 99 пайызы жылдамдығы жоғары 5G интернетімен қамтамасыз етіледі. Межелі мерзімге дейін грант саны 50 пайызға артып, 75 мың жас жоғары білімді тегін алады. Бұл — нақты жоспардың бір парасы ғана.
Президент өз сөзінде мазмұны жағынан мүлде жаңа құжат — Əлеуметтік кодекс əзірленетінін айтты. Кодексте қоғам мен билік арасындағы өзара келісім орнатудың тың тәсілдері көрсетілетінін жеткізді. Жалпы, мемлекет басшысы Қасым-Жомарт Тоқаевтың атқарушы органның оң имиджін нығайту, халықтың азаматтық белсенділігін арттыру, жергілікті өзін-өзі басқару ісін ілгерілетуге арналған бастамалары көпшіліктің көңілінен шығып жүр. Келер жылдан бастап ауыл әкімдерін сайлаудың жаңа үлгісі, қазына қаржысын халықтық бақылауды үйлестіретін жобалар — сөзіміздің айқын дәлелі.
Келешекте қоғамдық кеңестердің де құзыреті кеңейеді. Азаматтық қоғамның рөлі артқан сайын маңызды мəселелер атүсті емес, ашық алаңдарда жан-жақты зерттеліп, қоғамның қызу талқысынан өтеді. Уақыт талабына сай келетін бұл өзгерістер бəрімізге зор жауапкершілік жүктейді.
Тəуелсіздігіміздің торқалы тойы аталып өтетін алдағы жылды ел өміріндегі ерекше оқиғамен бастағалы отырмыз. Бұл науқанда да саяси мəдениетімізді, ауызбіршілігімізді танытып, азаматтық ұстанымымызды білдірейік! Ең бастысы, тəуелсіздігіміз тұғырлы, береке-бірлігіміз баянды болғай!
Ербол Салықов,
«Nur Otan» партиясы БҚОФ Саяси кеңесі Бюросының мүшесі,
Облыстық қоғамдық кеңестің төрағасы.
