Құрметті батысқазақстандықтар!
Мемлекет басшысы Қасым-Жомарт Кемелұлы айтқандай, бейбіт түрде айтылған талап-тілектің ешқайсысы ескерусіз қалмайды. Аз уақыт ішінде қабылданған шұғыл шешімдер – соның айқын дəлелі. Президент өз Үндеуінде 11 қаңтарда Мəжілісте елдің əлеуметтік-экономикалық жағдайын жақсартуды көздейтін реформалар мен нақты іс-шаралар жоспарын ұсынатынын жеткізді.
Біз бейбіт түрде басталған шерулерді шиеленістіріп, қасақана қарулы қақтығыстарға ұластырған арандатушы топтың əрекетіне түбегейлі қарсымыз! Кəсіби қызметін атқара жүріп ажал құшқан құқық қорғау қызметкерлері мен әскерилердің отбасына, жақындарына қайғырып көңіл айтамыз. Олар – нағыз батырлар! Ал Отанымызда ойран салғандармен ортақ мəміленің болуы мүмкін емес! Сондықтан мемлекет басшысы Қ.Тоқаевтың күштік құрылымдарға берген бұйрығы орынды деп санаймыз. Сондай-ақ, ҰҚШҰ-ға мүше мемлекеттердің басшыларынан біріккен бітімгерлік күшті сұратуын да уақытылы əрі көкейге қонымды қадам деп есептейміз. Біріншіден, бітімгерлік күштер еліміздегі стратегиялық нысандардың қорғалуын және қызметін қамтамасыз ету үшін қысқа мерзімге келді. Екіншіден, бұл біздің əскери əлеуетімізге сенімсіздік емес, саны да, сапасы да толық нақтыланбаған лаңкестерге Қазақстанның жалғыз емес екенін аңғартудың лайықты жолы деп те түсінгеніміз абзал.
Президент бүкіл еліміз бойынша конституциялық заңдылық орнатылғанын мəлімдеді. Дегенмен, босаңсуға болмайтынын да қаперге салды. ҚР Конституциясына сəйкес, мемлекет басшысының жарлығымен БҚО-да да төтенше жағдай енгізілді. 19 қаңтарға дейін қаулыда көрсетілген тəртіппен жүріп-тұру шектелді. Өңір тұрғындарын қауіпсіздікті қамтамасыз ету мақсатында қабылданған шектеу шараларына түсіністікпен қарап, ортақ тəртіпті бұлжытпай сақтауды сұраймыз!
Қадірлі қазақстандықтар!
«Ұйымдасқан ұтады, біріккен бітіреді». Баршаңызды тəуелсіздік жылнамасындағы тағдыршешті кезеңде бір үйдің баласындай, бір қолдың саласындай болып Президент Қасым-Жомарт Кемелұлын қолдауға шақырамыз! Тəуелсіздікті тұғырынан тайдырғысы келетіндермен күрделі күресте біз мемлекет басшысы Қасым-Жомарт Кемелұлымен бірге екенімізді мəлімдейміз жəне отандастарымызды осы ой-пікірге қосылуға үндейміз!
