Онда 3 мəселе қаралды. Алдымен «Діни әдебиетті жəне діни мазмұндағы өзге де ақпараттық материалдарды, діни мақсаттағы заттарды тарату үшін арнайы тұрақты үй-жайлардың орналастырылуын бекіту туралы» облыс əкімдігінің қаулысына ұсынылған өзгерістер жобасы жайлы облыстық дін істері басқармасы басшысының міндетін атқарушы Азат Қаратай хабарлама жасады. Оның айтуынша бүгінде облыс аумағында діни мазмұндағы кітап сататын 5 орын бекітілген. Жеке тұлғалардың өтінішіне сәйкес олардың қатарын тағы 2 орынмен толықтыру көзделіп отыр.
– Діни мазмұндағы кітаптарды сататын орындардың тізімін жаңартуды жоспарладық. Осы орайда тұрғындар тарапынан діни əдебиеттердің ара-жігін қалай ажыратуға болатыны жөнінде сұрақтар жиі қойылады. Мұндай мазмұндағы рұқсат етілген кітаптарда ҚР Ақпарат жəне қоғамдық даму министрлігінің дінтану сараптамасынан өткені туралы белгі болады, – деді Азат Айболатұлы.
Төралқа мүшелері Айгүл Есекенова мен Жансұлу Төремұратова теріс діни ағымдармен күрес бағытында іс-тəжірибесін бөлісіп, бұл салада сауаттылық пен қырағылықтың маңызын қаперге салды.
Төралқа отырысының күн тəртібіндегі келесі мəселелер мемлекет тарапынан шаруаларды қолдауға бағытталған іс-шараларға арналды. Атап айтқанда, облыстық ауыл шаруашылығы басқармасының бөлім басшысы Кеңес Кайдашев тұқым шаруашылығын дамытуға бағытталған демеуқаржы мөлшері жəне субсидияланатын тыңайтқыштар түрлерінің тізбесіне тоқталды. Сала маманының сөзінше, бұл қолдау шаруалардың көктемгі далалық жұмыстарға тыңғылықты дайындығына жəне өсімдік шаруашылығында өнім сапасын арттыруға айтарлықтай əсер етіп отыр.
Төралқа мүшелері ұсыныс-пікірін ортаға салды. Қаулы жобалары мақұлданды.
