Баршаңызды Жеңіс күні мерекесімен құттықтаймыз! Бұл күн – тағзым мен құрметтің, жанқиярлық ерліктің, асқақ рухтың, Отанға деген махаббаттың мейрамы.
Жауға қарсы тойтарыс беріп, жеңісті жақындатқан жауынгерлердің қатарында 76 мыңнан астам батысқазақстандық болды. Олардың жартысына жуығы жан алысып, жан беріскен шайқастарда шейіт болды. Бомбадан көз ашпаған Бөкейордасы мен Жəнібек ауданын Сталинград майданына жақын тыл десек, Жайықтың сол жағалауында да соғыс іздері «сайрап» жатқанын бірі білсе, бірі білмейді. Кеңес Одағының қолданысындағы «Дуглас» ұшағын Жайықтың арғы бетінде, Есенсай елді мекенінің түбінде жаудың атып құлатқаны облыста соғыс отын сезінген аумақтың əлдеқайда кең екенін аңғартады.
Бүгінде Жайық жерінде 38 соғыс ардагері мен 4454 тыл еңбеккері тұрады. Мереке күні оларға зор денсаулық, айналасына амандық тілейміз. Ұрпағына ұран-үлгі болып, ұзақ жасасын деп дұға етеміз. Отан үшін от кешкен майдангерлерге, тылда тынымсыз еңбек еткен ардагерлерге əрдайым тағзым етеміз!
Батырлардың ұрпағы, ардақты ақжайықтықтар!
Баршаңызды болашақта да ата-əжелеріміздің аманатына адалдық танытып, бүгінгі бейбіт күнді бағалауға, көздің қарашығындай қорғауға шақырамыз! Ел іргесі сөгілмесін, ер тізесі бүгілмесін! Ашық аспан аясында атамекенімізде салтанат құрған тыныштық пен тұрақтылық ұзағынан сүйіндірсін! Жеңіс күні құтты болсын!
