Облыстық Қоғамдық кеңестің төрағасы Ербол Салықов Қазақстан Республикасы Президентінің жанындағы мемлекеттік басқару академиясы БҚО бойынша филиалында түрлі деңгейдегі мемлекеттік қызметкерлермен кездесті. Ол ««Халық үніне құлақ асатын мемлекет» тұжырымдасын жүзеге асырудағы Қоғамдық кеңестердің рөлі» тақырыбында дәріс оқып, консультативтік-кеңесші, байқаушы құрылымның қызметі, мақсаты мен міндеті туралы толыққанды мәлімет берді.
Сіздер мемлекеттік салада облыстық, аудандық, ауылдық деңгейде түрлі лауазымдық қызмет атқарып келесіздер. Кәсіби тұрғыда жетіліп, тәжірибе толысқан сайын жаңа мүмкіндіктер ашылады. Қай қызметте болсаңыз да қоғаммен сауатты байланыс орната білгендеріңіз абзал. Жалпы, билік пен қоғам арасында сындарлы диалогқа әрқайсымыз мүдделі болуымыз керек. Осы орайда халықты мазалаған мәселелер мен күн тәртібіндегі көкейтесті тақырыптарды талқыға салып, жоғары құрылымдарға жеткізуде Қоғамдық кеңестердің рөлі зор. Сондықтан жергілікті атқарушы органдардың Қоғамдық кеңестермен өзара іс-қимыл деңгейін жетілдіру маңызды. Бүгінгі жүздесудің бір мақсаты – осы, – деді Ербол Ғұмарұлы.
Облыстық Қоғамдық кеңес төрағасының дәрісінде елімізде Қоғамдық кеңестердің қалыптасу тарихы, даму үдерісіндегі оң және теріс үрдістер, мәселелерді шешу жолындағы әлеуеті мен тиімділігі, жұмыс нәтижелері, азаматтардың консультативтік-кеңесші құрылымның жұмысы туралы хабардарлығы сияқты басым бағыттар қамтылды. Қатысушылардың сұрақтарына жауап берілді.
Айта кетейік, «ҚР Қоғамдық кеңестер туралы» заңына сәйкес ауылдық округтерде Қоғамдық кеңестердің функцияларын жергілікті қоғамдастықтар іске асырады. Сондықтан, бұл жүздесу басқарма, бөлім басшылары ғана емес, ауыл атқамінерлері үшін де пайдалы болғаны анық.
