БҚО қоғамдық кеңесі денсаулық сақтау нысандарына мониторинг жүргізіп, медициналық қызметтің сапасы мен қолжетімділігін арттыруға атсалысатыны туралы бұған дейін айтылған еді. Əрине, бұл маңызды əрі күрделі салада барлық бақылау тек мониторингпен шектелмейтіні əрі толық шешілмейтіні де түсінікті. Сондықтан, қоғамдық кеңес көрсетілетін қызметтің сапасын жақсартудың жан-жақты жолдарын қарастырып отыр. Күні кеше уақыт талабына сай əлеуметтік желілер арқылы ел-жұрттың пікірін ескеру, ұсыныс-тілегін тыңдау мақсатында ашық алаң ұйымдастырылды.
Бүгін медицина ардагерлері, денсаулық сақшылары, осы салада айтары бар азаматтардың басын қосқан іс-шараны ашып, жүргізген Батыс Қазақстан облыстық қоғамдық кеңесінің төрағасы Ербол Ғұмарұлы өз сөзінде əлеуметтік желілер жəне оффлайн сауалнамалар қорытындысын да тілге тиек етті. «Біздің басты мақсат – өз құзыретіміз шегінде өңірдегі медициналық қызметтің сапасын арттыруға атсалысу. Аймақта абыройлы ақ желеңді жандар аз емес. Жетістіктер де баршылық. Дегенмен, ел пікірін ескерсек, ақсап тұрған тұстар да жоқ емес. Кейбір қордаланған мəселе қатып қалған жүйеге қатысты болуы мүмкін. Біз тиісті министрлікке ұсынымдарымызды жіберуге дайынбыз», – деді қоғамдық кеңестің төрағасы. Бұл ұсынысты денсаулық сақтау саласының ардагерлері Бақтығали Ахметұлы мен Андрей Васильевич те қолдады. Олар медициналық қызметтің сапасына жол қатынасының нашарлығы мен кадр тапшылығы да айтарлықтай əсер етіп отырғанын жеткізді. Осы орайда облыстық ардагерлер кеңесінің төрағасы, ҚР Денсаулық сақтау саласының үздігі Мақсот Қабышұлы медициналық колледждердегі онлайн оқытудың миға қонымсыз екенін айтып, қашықтан оқығандардан дені дұрыс дəрігер шықпайтынын күйіне жеткізді. Медициналық оқу орындарының студенттерін оффлайн оқытудың қажеттігіне назар аудартты. Отырыста осы жəне өзге де мəселелерге қатысты нақты əрі дәлелді ой-тұжырымдар айтылды. Қоғамдық кеңес сала ардагерлерімен, білікті мамандармен бірлесіп, тиісті ұсынымдар əзірлейді.
