Аймақта жұмыс сапарымен болған ҚР Ақпарат және қоғамдық даму министрі Аида Балаевамен кездесу іс-шарасының модераторы, облыстық қоғамдық кеңес төралқасының мүшесі Ақсерік Әйтімов өңірлік консультативтік-кеңесші органның қызметіне шолу жасады. Биыл БҚО қоғамдық кеңеінің 6 отырысы ұйымдастырылып 14 мәселе қаралды, 15 төралқа отырысы өткізілді. Онда облыстық қоғамдық кеңес мүшелерінің, үкіметтік емес ұйымдардың, мемлекеттік органдардың және жекелеген азаматтардың тарапынан түскен ұсыныстар қаралды. Ақсерік Сарыұлы БҚО қоғамдық кеңесінің ақпан-мамыр айлары аралығында медициналық қызметтің сапасын байқау мақсатында жүргізген қоғамдық мониторинг жұмыстарына да тоқталды. «Қоғамдық кеңес жанынан төрт бағытта уақытша жұмыс органдары құрылды. Қоғамдық сараптамаға бай тәжірибелі сала ардагерлері арнайы шақырылды. Жұмыс тобының мүшелері өңірдегі медициналық нысандарды аралап, қалыптасқан жағдайға тереңірек үңілді. Құзырлы мекеме, ұйымдардан мониторинг нысанасына жататын қажетті ақпараттар сұратылып, жауап хаттары алынды. Облыстық ішкі саясат басқармасымен бірлесе отырып, өңір тұрғындары арасында ашық және анонимді сауалнамалар өткізілді. Әлеуметтік желі қолданушылары арасында ашық алаң ұйымдастырылды. Қоғамдық мониторингтің нәтижелері бойынша қорытынды шығарылып, тиісті ұсынбалар әзірленді», – деді БҚО қоғамдық кеңесінің төралқа мүшесі. Ақсерік Сарыұлы облыстық қоғамдық кеңес отырысы қарарының орындалуы жөнінде қараша айында сала басшылығымен қорытынды жиын өткізу жоспарланғанын жеткізді.
