Қазіргі таңда «Қоғамдық кеңес керек пе?» деген сауал күн тәртібінен түсіп, халық енді «қоғамдық кеңестердің әлеуеті мен белсенділігін қалай арттырамыз?» деген сұраққа жауап іздегендей. Бұл үрдіс консультативтік-кеңесші, байқаушы құрылымның қажеттігін сөзсіз сездіріп отыр. Бұл туралы БҚО Қоғамдық кеңесінің төрағасы Ербол Салықов Астана қаласында өтіп жатқан Қоғамдық кеңестердің ІІІ республикалық Мəжілісінің пленарлық отырысында айтты.
Ербол Ғұмарұлының сөзінше көпшілік Қоғамдық кеңестердің әлеуеті әлдеқайда жоғары, мемлекеттік құрылымдарға билік ету мүмкіндігі мол деп ойлайды. Ал Қоғамдық кеңестердің құқықтық мəртебесінің жоқтығын, шешімдері ұсынба ретінде қабылданатыны және ол бойынша мемлекеттік құрылымдарда жауапкершілік айқындалмағаны жайлы жұртшылық біле бермейді.
— Мысалы, біз түрлі мəселелер бойынша əр деңгейлі мемлекеттік органдарға ұсынымдар жолдаймыз. Алайда кейбірінен кері байланыс болмай немесе жарытып жауап берілмей жатады. Əрбір хаттың артында азаматтық қоғамның үні, ел-жұрттың пікірі жатқанын мемлекеттік органдар естен шығармаса дейміз. Біздің ойымызша заңнамалық тұрғыда Қоғамдық кеңестердің әлеуетін әлі де жетілдіру қажеттігі туындап отыр, — деді Ербол Ғұмарұлы. Қоғамдық кеңестер қызметіне қатысты жергілікті тұрғындардың хабардарлығына тоқталған ол келесі жайтқа назар аударуды сұрады.
— Кейбір ұйымдар мен саяси партиялар жанынан жасақталған алаңдар да «қоғамдық кеңестер» деп аталады. Соның әсерінен қарапайым халық «Қоғамдық кеңестер туралы» заңның аясында əрекет ететін әкімшілік-аумақтық бірліктің құрылымы мен жаңағыдай топтардың ара-жігін ажырата алмай қалып жатады. Мұндай түсініспеушілік Қоғамдық кеңестердің қызметіне кері әсер ететіні анық, — деді БҚО Қоғамдық кеңесінің төрағасы.
