Ресей Федерациясында жарияланған ішінара мобилизациядан кейін көрші елдің 5 облысымен шектесіп жатқан аймағымызға келушілер саны күрт артты. Бұл үрдіс ел-жұрттың алаңдаушылығын туғызды. Осыған орай облыстық Қоғамдық кеңестің бүгінгі отырысы қалыптасқан жағдай жөнінде нақты деректерді білу және бұл бағытта атқарылып жатқан іс-шаралармен танысу мақсатында өткізілді. Облыстық Қоғамдық кеңестің төрағасы Ербол Салықов төрағалық еткен жиынға облыстық мәслихат хатшысы Бибігүл Қонысбаева, облыс әкімінің орынбасары Бақытжан Нарымбетов, құзырлы құрылымдардың басшылары, сондай-ақ қоғам белсенділері қатысты.
Отырыс барысында БҚО ПД Көші-қон қызметі басқармасы бастығының міндетін атқарушы Дулат Малаев, ҚР ҰҚК ШҚ БҚО бойынша департаментінің аға консультанты Саламат Кенжеғұлов, БҚО ПД Жергілікті полиция қызметі басқармасы бастығының орынбасары Ернар Сұлтанғалиев хабарлама жасады.
Облыстық Қоғамдық кеңес мүшелері халықтың көкейінде жүрген сауалдарды жолдап, күн тәртібіндегі мәселені жан-жақты талқыға салды. Қоғам өкілдері ең алдымен құзырлы құрылымдардың қырағылығын күшейтуді қаперледі. Көрші елде ішінара жұмылдыру жарияланған сәттен, яғни 21 қыркүйектен бері елге келушілер туралы толыққанды мәлімет жасақтаудың маңыздылығы айтылды. Бұл ретте, облыстық Қоғамдық кеңес мүшелерінің пікірінше, аймаққа келген шетел азаматтарын арнайы есепке алу жұмысын жүйелі ұйымдастыру қажет.
— Дерекқорда жеке тұлғалардың денсаулық жағдайы, соттылығы туралы да нақты ақпарат болғаны дұрыс. Бұдан бөлек шекара шебінде жұмысты ширатып, шетел азаматтарының жеке ұстанымын, геосаяси жағдайға байланысты қалыптасқан түсінігін, интернет кеңістігіндегі көзқарасын да шолып шыққан артық болмайды. Ниет-пиғылы жат, мемлекеттік мүддемізге қайшы, ұлттық қауіпсіздікке нұқсан келтіретіні анықталса, мұндай шетелдіктердің шекарадан аттап басуына мүмкіндік бермеу керек, — дейді облыстық Қоғамдық кеңестің мүшелері.
Облыс әкімінің орынбасары Бақытжан Нарымбетов аймақтағы ахуалды жергілікті атқарушы құрылым жан-жақты қадағалап отырғанын жеткізді.
— Осыған дейін облыс әкімінің төрағалығымен шекара мәселелері жөніндегі үйлестіру кеңесінің 3 отырысы өткізіліп, күштік құрылымдар мен мемлекеттік органдарға нақты тапсырмалар берілді. Әрине, аймақта тіркелген РФ азаматтарының саны шекара асқандардан әлдеқайда аз. Себебі, басым бөлігі өңір аумағын транзиттік бағытта пайдаланып отыр. Аймақ басшысы тапсырған маңызды мәселенің бірі – Ресеймен шекарадағы Қазақстан азаматтарын қайтару. Күні кеше өткен үйлестіру кеңесінің отырысында осы мәселені шешу бойынша облыс әкімі атынан Үкіметке ұсыныстар жолданды. Қалыптасқан жағдайға байланысты қоғамдық кеңес мүшелерінің талап-тілектері де орынды, баршамызға қырағылық пен ауызбіршілік қажет. Біз үшін жерлестеріміздің қауіпсіздігі мен көңіл-күйі бірінші орында. Көп ұзамай жағдай оңалар деп сенейік, — деді Бақытжан Хаберұлы.
Отырысты қорытындылаған облыстық Қоғамдық кеңестің төрағасы Ербол Салықов құзырлы құрылымдарға тиісті ұсынымдар жолданатынын жеткізіп, азаматтық ұстанымын танытқан қоғам белсенділеріне ризашылығын білдірді.
