Аймақта асыл тұқымды мал шаруашылығын дамытуды субсидиялау үшін 4 млрд. теңгеге жуық қаржы қарастырылып отыр. Облыстық қоғамдық кеңестің төралқа отырысында жергілікті бюджеттің нақтыланған шешім жобасын таныстырған тиісті басқарма басшысы Тілепберген Каюпов осындай мəлімет келтірді. Қазына қаржысының біраз бөлігі жол құрылысына, индустриалды инфрақұрылымды дамытуға, білім, денсаулық сақтау жəне əлеуметтік салаға жұмсалады. Қоғамдық кеңестің төрағасы Ербол Салықов пен төралқа мүшелерін пандемияның болуы ықтимал екінші толқынына дайындық барысы алаңдатты. Қазірдің өзінде өңірде қауіпті індеттің ілмегіне іліккендер қайтадан тіркеліп жатыр, аурудан айыққан азаматтардың коронавирусты қайталап жұқтыру мүмкін екені де расталып отыр. Қоғамдық кеңес мүшелері бірінші толқын барысында жіберген кемшіліктерден сабақ алып, жергілікті атқарушы органның күні бұрын қамданып, ширақ қимылдағанын қалайтынын ашық айтты. Облыстық экономика жəне бюджеттік жоспарлау басқармасының басшысы медицина саласына қажетті қаржы бөлінгенін, қалыптасқан жағдайға байланысты жан-жақты дайындық жүргізіліп жатқанын жеткізді. Осы ретте орта медициналық мамандарды даярлауға мемлекеттік гранттардың санын арттыру бастамасы да қоғамдық кеңес мүшелері тарапынан қолдау тапты.
Төралқа отырысында облыс əкімі аппаратындағы лауазымды адамдардың азаматтарды жеке қабылдауы регламентінің жобасы қаралды. Аталған аппараттың өтініштер бөлімінің басшысы Ақжеміс Сағаденованың сөзінше жоба жоғары атқарушы органның үлгілік ережесіне сай жасақталған. Қоғамдық кеңес мүшелері регламентті мақұлдағанымен, азаматтардың арыз-шағымымен жұмыстанғанда жоғары жауапкершіліктің болуын қаперледі. Төралқа мүшелері мемлекет басшысы Қасым-Жомарт Тоқаевтың «Халық үніне құлақ асатын үкімет» тұжырымдамасының түпкі мақсаты билік пен бұқараның байланысын бекемдеу екенін еске салды. Кейде лауазымды тұлғаларға талап-тілегін айта баратындардың арасында мəселесі сол бойда-ақ шешілетін немесе шұғыл әрекетті қажетсінетін жағдайлар болады. Сондайда қатып қалған регламентпен əлеуметті əуре-сарсаңға салмай, ортақ тіл табысып, жедел əрекет етудің маңызы жоғары. Төралқа мүшелері облыс əкімі аппаратының бөлім басшысына осындай ақыл-кеңесін айтып, азаматтарды қабылдауға атүсті қарамауды қадап айтты. Төралқа құрамындағы еңбек ардагерлері өмірлік мысалдар келтіріп, тәжірибесімен бөлісті.
Төралқа отырысының күн тəртібінде бұдан бөлек облыстық мəслихаттың кейбір шешіміне өзгеріс енгізу, елді мекендердің әкімшілік-аумақтық құрылысы, мал шаруашылығының өнімділігін арттыру, елді мекендердің аумағында иттер мен мысықтарды асырау жəне серуендету қағидаларына қатысты төрт мəселе қаралды.
Төралқа отырысы санитарлық талаптарға сай zoom платформасы арқылы онлайн режімде өткізілді.
