Бұл туралы Парламент депутаттары Ләззат Рысбекова, Снежанна Имашеваның БҚО Қоғамдық кеңесінің мүшелерімен кездесуінде аталған консультативтік-кеңесші, байқаушы құрылымның төралқа мүшесі Бибігүл Қонысбаева айтты. Оның ойынша елімізде заң шығару процесінде әлі де жетілдіруді қажет ететін тұстар жеткілікті. «Заң жобаларын талқылау іс-шараларына аймақ өкілдері кеңінен тартылуы керек. Кей жағдайда талқылауға ұсынылған жобаларға байланысты өңірден жолданған ұсынымдар ескерілмей қалатыны жасырын емес. Ашық нормативтік-құқықтық актілердің интернет порталы жұмыс істеп тұрғаны рас. Дегенмен, ол алаңдағы пікірлерге орталық атқарушы органдар тарапынан толыққанды жауап беріліп жатқан жоқ. Мүмкін, салалық министрліктер заң шығарушы органның алдында порталдағы пікірлерге байланысты қосымша сараптама дайындауы керек шығар», – деді Бибігүл Тишанқызы.
ҚР Парламенті Мәжілісінің депутаты Снежанна Имашева ұсыныстың орынды екенін айтып, заң жобаларының егжей-тегжейлі талқыланып, қабылдануына халық қалаулылары қашанда мүдделі екенін жеткізді. Сондай-ақ, төменгі палатаның заң жобаларын дайындау бойынша жұмыс топтары тиісті сала мамандарын, қоғам өкілдерін кеңінен тартуға тырысатынын, кейде азаматтар тарапынан да немқұрайлылық болатынын тілге тиек етті. Ал, «Ашық Үкімет» жобасы аясында заң жобаларын жария талқылау ісін жандандыру, кері байланысты жетілдіру ісіне қатысты ұсынысты қаперге алатынын жеткізді.
