ҚР Ақпарат және қоғамдық даму министрі Аида Балаеваның облыстық және қалалық қоғамдық кеңестің мүшелерімен, үкіметтік емес ұйымдардың өкілдерімен кездесуінде NEET санатындағы жастармен жұмыс жүргізуге қатысты ұсыныс-пікірлер айтылды. БҚО бойынша «Болашақ» корпоративтік қорының директоры Салтанат Тұманбаева «Азаматтық бастамаларды қолдау орталығының» грантын иеленіп, аталған санаттағы жастар санын төмендету мақсатында ел көлемінде еңбектеніп жатқанын жеткізді. «NEET санатындағы жастар көрсеткіші бойынша БҚО төменгі орында. Біз өзіміздің іс-тәжірибемізді республика көлемінде таратуға, жастарды әлеуметтендіруге атсалысамыз. Әзірге екі мәселеге тоқталғым келеді. Біріншіден, бұл санаттағы жастармен жұмысты жүйелеу үшін ҚР Білім және ғылым министрлігі тарапынан да мүдделілік болса деймін. Екіншіден, мәселенің өзектілігін ескере отырып, аймақтарда жастармен жұмыс жөніндегі ресурстық орталықтар нақты осы бағытпен айналысқаны дұрыс деп ойлаймын», — деді Салтанат Асқарқызы. Министр де мәселенің маңыздылығына екпін түсіріп, мұндай жастармен жұмыс заңнамалық тұрғыда күшейтілетінін жеткізді. Атап айтқанда, кейбір заңнамалық актілерге мемлекеттік жастар саясаты мәселелері бойынша өзгерістер мен толықтырулар енгізу туралы заң жобасы әзірленген.
Айта кетейік, NEET – жұмыс істемейтін, білім алу немесе кәсіби даярлықпен айналыспайтын және білім беру жүйесі мен жұмыспен қамту саласынан тыс жастардың бөлігі.
