Осындай атаумен облыстық Қоғамдық кеңес жанындағы диалог алаңының отырысы өткізілді. Оған облыстық Қоғамдық кеңестің төрағасы Ербол Салықов төрағалық етті. «Жайық таңы» қоғамдық бірлестігінің өтініші негізінде ұйымдастырылған іс-шараға облыстық мəслихат хатшысы Бибігүл Қонысбаева, облыстық басқарма басшылары, облыстық Қоғамдық кеңес мүшелері, үкіметтік емес ұймдар мен БАҚ өкілдері қатысты. Алдымен облыстық ішкі саясат басқармасының басшысы Ерлан Ғалиев баяндама жасап, қоғамдық ұйымдармен байланыс орнатуда мемлекеттік органдардың мүдделілігін арттырудың маңыздылығына тоқталды.
— Облыс əкімі мемлекеттік əлеуметтік тапсырыстың тиянақты əрі сапалы ұйымдастырылуы туралы нақты тапсырмалар жүктеп отыр. Кейінгі уақытта жүргізілген оңтайландыру жұмыстарының нəтижесінде бірқатар басқармалар МƏТ (мемлекеттік əлеуметтік тапсырыс) аясында ұйымдастырылып келген бір реттік іс-шаралардан бас тартты. Нəтижелілігі төмен, ал шығыны көп ондай іс-шаралардың орнына бір жылдық, тіпті екі, үш жылдық жобаларға зор көңіл бөлгеніміз дұрыс, — деді Ерлан Ерсайынұлы. Ол қазіргі таңда өзектілігі жоғары тақырыптар, атап айтқанда еңбек адамдарын ұлықтау, қоршаған ортаны қорғау, жастарды жат қылықтардан, есірткілік заттардан аулақ болуға шақыратын пайдалы жобаларды жүзеге асыру жоспарланғанын, қоғам тарапынан түсетін басқа да ұсыныс-пікірлерді талқылауға дайын екенін жеткізді.
Жиында «Жайық таңы» қоғамдық бірлестігі дайындаған «БҚО-да мемлекеттік əлеуметтік тапсырысты іске асыру бойынша аналитикалық есеп таныстырылды. «Мемлекеттік əлеуметтік тапсырысты қалыптастырудан бастап нəтижелерді мониторингілеуге дейін» жобасының үйлестірушісі Салтанат Тұманбаеваның сөзінше ҮЕҰ мен мемлекеттік органдардың бір бөлігі əлі күнге дейін мемлекеттік əлеуметтік тапсырыстың түпкі мəнін терең түсінбейді. Оның айтуынша бұл — үкіметтік емес ұйымдарды қолдау емес, ең алдымен əлеуметтік мəселелерді шешу құралы. Сараптамалық есепке зерттеудің мəн-мақсаты, жүргізілген талдау жұмыстары, анықталған кемшіліктер бойынша нақты ұсынымдар енгізілген.
«Жайық таңы» қоғамдық бірлестігінің төрайымы Гүлбаршын Мұштанова БҚО-да мемлекеттік əлеуметтік тапсырыстың тиімділігін арттыру аясында коммерциялық емес ұйымдар секторымен өзара іс-қимыл бойынша 2022-23 жылдарға арналған Жол картасын көпшілік назарына ұсынды. Құжат еліміздегі тəжірибелі сарапшы-заңгерлермен бірлесе дайындалған. Жол картасында əр түрлі деңгейдегі МƏТ мəселелерін зерделеу, талдау, оны іске асыруға жауапты мемлекеттік қызметшілердің біліктілігі мен лоттарды қалыптастыру рəсімінің тиімділігін арттыру, тапсырыс беруші мен орындаушы арасындағы тиімді қарым-қатынастарды қалыптастыру жəне тағы басқа міндеттер айқындалып, оларды жүзеге асыруға арналған іс-шаралар мен мерзімі белгіленген.
Жиналғандар мемлекеттік əлеуметтік тапсырыстың тиімділігін арттыруға қатысты ой-пікірін ортаға салды. Олар өңірдің өз ерекшеліктерін ескере отырып, аса қажетті жобаларды жүзеге асырудың маңыздылығын сөз етті.
— Бүгін пайдалы басқосу болды деп ойлаймын. Бастысы мемлекеттік органдар мен қоғамдық ұйымдардың байланысы берік болуы қажет. Облыстық Қоғамдық кеңестің бұл бағытта жоспары бар, біз алдағы отырыстардың бірінде бұл тақырыпқа ораламыз. Соңында ізі жоқ, пайдасы жоқ бір реттік іс-шаралардан арылып, кешенді жобаларға көңіл бөлгендеріңіз өте құптарлық. Бүгінгі айтылған ой-пікірлерді ескере отырып, мемлекеттік органдарға тиісті ұсынымдарды жолдаймыз, — деді диалог алаңының отырысын қорытындылаған Ербол Ғұмарұлы.
