БҚО қоғамдық кеңесінің төралқа отырысында ауыл шаруашылығы саласына қатысты, соның ішінде тыңайтқыштар тізбесі мен субсидиялар көлемін бекіту бойынша үш мəселе қаралды. Күн тəртібіндегі мəселелер туралы хабарлама жасаған облыстық ауыл шаруашылығы басқармасы басшысының орынбасары Сатқан Өмірзақ жергілікті бюджеттен қосымша 3 млрд. 365 млн. теңге қаржының бөлінуіне байланысты мал шаруашылығына берілетін демеуқаржының бірақатар бағыты өзгергенін мəлімдеді. Төралқа мүшелері тарапынан нақты əрі өткір сауалдар қойылды. Мəселен, қоғамдық кеңестің төрағасы Ербол Салықов ауыл шаруашылығы дақылдарының өнімділігі мен сапасын арттыруда тек минералды тыңайтқыштар емес, органикалық тыңайтқыштарды да кеңінен қолданудың маңыздылығына тоқталды. Бұл бағыттағы жұмыстың бəсеңдеп қалғанын, шаруаларды ынталандырудың деңгейі төмендеп кеткенін сөз етті. Сондай-ақ, шет елден шығу тегі асыл тұқымдыға сəйкес келетін ІҚМ аналық басын сатып алуға берілетін демеуқаржыны ел ішінде алудың мүмкіндігі сұралды. Ербол Ғұмарұлы малды қолдан ұрықтандыру жұмысы да саябырсып қалғанын сөз етті. Хабарламашы Сатқан Өмірзақтың сөзінше, ауыл шаруашылығы кооперативтері болмаса, жекенің қолындағы малды қолдан ұрықтандыру шығынын субсидиялау қарастырылмаған. Соған байланысты, қазіргі көрсеткішке де көңіл тояды деу қиын. Төралқа мүшесі Айгүл Есекенова мемлекеттік бағдарламалар аясында жыл сайын шаруаларға миллиондаған субсидия бөлініп жатқанына қарамастан, мал шаруашылығы саласындағы мəселенің жиі қозғалатынын айтты. Демеуқаржыға қол жеткізген шаруалардың тыныс-тіршілігіне зер салып, мемлекеттік бағдарламалардың ашықтығын қамтамасыз ету жөнінде ой қосты. Ауыл шаруашылығы басқармасы басшылығына жыл қорытындысы бойынша салалық сараптама əзірлеуді ұсынған төралқа мүшелері алдағы уақытта субсидиялау жұмыстарының ашықтығына қоғамдық кеңес тарапынан зер салатынын жеткізді.
