Осыған дейін облыстық қоғамдық кеңес денсаулық сақтау саласын бақылауды қамтамасыз ету мақсатында жұмыс топтарын жасақтағанын хабарлаған едік. Төралқа отырысында жұмыс тобының жетекшілері атқарған іс-шараларын қорытындылап, соның негізінде бірқатар ұсыныс білдірді.
Мəселен, облыстық қоғамдық кеңестің хатшысы Ақсерік Əйтімов сала ардагерлерімен бірге қаладағы №1, №3, №5 жəне №6 емханаларға аяқтай барып, қалыптасқан ахуалға зер салды. Емделушілермен, дəрігерлермен дидарласқан Ақсерік Сарыұлы медицина саласында кадр тапшылығы, халық санына шаққанда жүктеменің тығыздығы, ақпараттық жүйенің дұрыс жолға қойылмауы, медициналық университеттердегі оқудың ұзақтығы, қала дəрігерлеріне əлеуметтік көмектің жоқтығы сияқты негізгі мəселелерді жіпке тізді. Ол облыс орталығында орналасқан медицина мамандарын даярлайтын қос колледжді қаржылай қолдауға басымдық беру қажеттігіне тоқталды.
Қоғамдық кеңес мүшесі Людмила Щукина өңірдегі 21 денсаулық сақтау нысанына жүргізген талдау қорытындысын жариялады. «Барлық мекемеде пациенттерді қолдау қызметі жасақталған. Бұл қызметті одан əрі жандандырып, тұрғындар үшін тиімділігін арттыру керек деп ойлаймын. Тағы бір мəселе — мекеменің қаржылық қызметін жүзеге асыруда жауапкершіліктің жалғыз бас дəрігерге түсетіні. Əсіресе, бюджеті миллиардтан асатын облыстық жəне қалалық көпбейінді ауруханалардағы жағдай алаңдатады. Бұл бір жағынан бас дəрігердің жұмысын қиындатса, екіншіден жариялылық пен ашықтыққа кері əсерін тигізіп отыр», — дейді Людмила Юрьевна.
Облыстық қоғамдық кеңестің мүшелері Айгүл Есекенова мен Бибігүл Қонысбаева денсаулық сақтау саласында қолданыстағы заңнама, нормативтік-құқықтық актілерге өзгерістер енгізу жөнінде ұсыныс білдіріп, пікір алысты. Мəселен, Бибігүл Тишанқызының ойынша, жергілікті халық санына байланысты ауруханаларды мəртебесінен айыру қаншалықты өзін ақтағанына көп жағдайда мəн берілмейді. «Бұл жерде заңнама талаптарынан бөлек, жергілікті жердің болашағына, адам тағдырына алаңдауымыз қажет. Ауылдық жерлердегі медициналық қызметтің сапасы да бұған тікелей байланысты», — дейді қоғамдық кеңестің мүшесі.
Онлайн режимде өткен жиында əдеттегідей абитуриенттерге ғана емес, жұмыс істеп жүрген орта буын медицина мамандарына да (фельдшер, мейірбике т.б.) жоғары оқу орнына түсу үшін облыс əкімі гранттарын тағайындау мүмкіндігін қарастыру жөнінде ұсыныс айтылды.
Облыстық қоғамдық кеңестің төрағасы Ербол Ғұмарұлы төралқа отырысын қорытындылап, кеңейтілген отырысқа дейін ұсынымдарды тағы да пысықтауды тапсырды. Айта кетейік, айдың соңына жоспарланған жиында облыстық қоғамдық кеңес мүшелері жергілікті атқарушы органға нақты ұсынымдарын жеткізеді.
