Қазақстан Республикасының кейбір заңнамалық актілеріне қоғамдық кеңестердің қызметі мәселелері бойынша өзгерістер мен толықтырулар енгізілгені белгілі. Атап айтқанда Қоғамдық кеңестердің құрамын жасақтау жəне өкілеттігін арттыру, уәкілетті органды анықтау, қоғамдық бақылауды жүргізу процедурасын реттеу, қоғамдық кеңестердің қызметін ұйымдастыруды қамтамасыз ету, квазимемлекеттік секторда қоғамдық кеңестер құру бағытында айтарлықтай оң өзгеріс бар. Дегенмен, əлі де болса пысықтайтын, тарқата түсетін тұстар жоқ емес. Бүгін облыстық қоғамдық кеңестің ІІ шақырылымдағы құрамымен кездескен ҚР Парламенті Мәжілісінің депутаттары Мəлік Құлшар мен Светлана Имашева төменгі палата қарауында болып, кейін мақұлданған маңызды құжаттың шығу тарихына тоқталды. 2015 жылы қабылданған Заңға жыл басында енгізілген өзгерістер мен толықтырулар жұмысты жандандырып, консультативтік-кеңесші органның дербестігін қамтамасыз етуді көздейтіні жан-жақты түсіндірілді. «Қоғамдық кеңестердің қызметі маған етене таныс. Аталған бағыттағы Заңға уақыт талабына сай өзгерістер енгізу туралы жобаға өңірден өзіміз де ұсыныс-пікірімізді жолдаған едік. Бірі қабылданып, енді бірі уақыттың еншісіне қалды. Дегенмен, заң шығарушы органның өкілі ретінде қоғамдық кеңестердің қызметін оңтайландыру ісін заңнамалық қамтамасыз етуге əлі де атсалысамыз. Азаматтық қоғамның үні қай кезде де маңызды. Қоғамдық кеңестердің құзыреті күшеймесе, кемімейді», — деді Мəлік Иманқұлұлы. Оның əріптесі Снежанна Валерьевна бұл бағыттағы сауалдарды өзі хатшысы болып табылатын Мәжілістің Заңнама және сот-құқықтық реформа комитетіне жолдауға болатынын жеткізді.
Облыстық қоғамдық кеңестің төрағасы Ербол Салықов II шақырылым құрамының 87 пайызы үкіметтік емес ұйым өкілдерінен тұратынын, жаңа заңнамада азаматтық қоғамның əлеуетін арттыруға ерекше екпін түсірілгенін тілге тиек етті. «Көкейде жүрген көп мəселе қамтылған. Алайда кей түйткілдер толығымен тарқатылды деуге əлі ерте. Мəселен, қоғамдық кеңестер қызметінің кейбір аспектілерін қаржыландыру, хатшы лауазымы үшін төленетін еңбекақыны қайта қарау қажет деп санаймын. Тағы бір мəселе, біз қызмет барысында облыс деңгейін айтпағанда, түрлі министрліктерге де хат жолдап отырамыз. Өкінішке қарай, кейбір орталық органдардан кері байланыс байқалмайды.», — деген Ербол Ғұмарұлы салалық министрліктерге жолданған хаттардың «тағдырына» жеке-жеке тоқталды.
Айта кетейік, каникул уақытында жолға шыққан халық қалаулылары «Nur Otan» партиясының сайлауалды бағдарламасы аясында әзірленген жол картасының өңірде орындалу барысына зер салады. Орал қаласынан бөлек, кестеге сай барлық ауданда болып, жұртшылықпен жүздеседі.
