«Біз өз тарапымыздан азаматтық қоғам өкілдерімен, үкіметтік емес ұйымдармен тығыз жұмыс істеп келеміз. Мәжілістің есігі сіздерге әрдайым ашық. Қоғамның барлық өкілін заң шығару қызметіне белсене қатысуға шақырамын». Биыл XI мәрте ұйымдастыпылған Қазақстанның Азаматтық форумында ҚР Парламенті Мәжілісінің төрағасы Ерлан Қошанов осылай деді. Ол Мәжіліс жанынан Қоғамдық палата жасақталғанын, бұл алаң депутаттық корпус пен азаматтық қоғамның арасын одан әрі жақындата түскенін жеткізді.
— Осы жерде барлық өңірден делегаттар жиналып отырсыздар. Ауыл-елдің жағдайын өздеріңізден артық ешкім білмейді. Сіздер Қазақстанды жан-жақты ілгерілетуде қыруар шаруа атқарып жүрсіздер. Еңбектеріңіз ерен, — деді Ерлан Жақанұлы.
Мәжіліс спикері елдегі саяси өзгерістерге тоқталды. Конституциялық реформаның нақты нәтижелері қазірдің өзінде көрініс тапқанына екпін түсірді.
— Сайлау үдерісі демократияланды. Парламентте көппартиялы жүйе қалыптасты. Қазір Мәжілісте елдегі барлық әлеуметтік топтың мүддесін қорғайтын халық қалаулылары жеткілікті. Бірмандатты сайлау жүйесі де депутаттар мен сайлаушылар арасында жаңа саяси мәдениеттің қалыптасуына жол ашты. Ауыл әкімдерін халық тікелей сайлауға көшті. Биыл аудан әкімдерін де тікелей сайлау үдерісі басталады. Мұның бәрі — Әділетті Қазақстанның алғышарттары
Естеріңізде болса Президент сайлауы қарсаңында азаматтық қоғам өкілдері мен саяси партиялар бірігіп, кандидатты қолдау каолициясын құрдық. Қай ұйымда болсақ та, ортақ мақсат жолында бас біріктірдік. Міне, тәуелсіздік тұғырын бекітіп, жаһандану дәуірінде жаңа Қазақстанды жандандыру үшін осындай береке-бірлік қай-қайсымызға да керек. Форум жұмысына сәттілік тілеймін, — деді Ерлан Жақанұлы.
Айта кетейік, Азаматтық форум 2 жылда бір өткізіледі. Биылғы алқалы жиын «Әділетті Қазақстан: бәріміз және әрқайсымыз үшін — азаматтық қоғам дамуының басым бағыты» деп аталды. Оған барлық аймақтан 600-ден астам делегат жиналды. БҚО делегаттары қатарында облыстық қоғамдық кеңестің төрағасы Ербол Салықов, облыстық қоғамдық кеңес мүшелері Алтынай Искалиева мен Біржан Кухаев қатысып жатыр.
