Сіздерді адамзат тарихында ұмытылмас із қалдырған Ұлы Отан соғысының аяқталған күні – Ұлы Жеңіс күнімен шын жүректен құттықтаймыз!
Бұл күн – Отан қорғаудағы өшпес ерлік пен өлшеусіз даңқтың, халқымыздың шексіз қаһармандығы мен мұқалмас қажыр-қайратының және тылда тынымсыз еңбек еткен аға, апаларымыздың ерен ерлігі, биік рухының мерекесі.
1941-1945 жылдары болған сұрапыл соғысқа Қазақстаннан 1,8 миллион адам аттанып, 600 мыңы елге оралған жоқ.
Ұлы Отан соғысында 520 қазақстандық Кеңес Одағының батыры атағын алды. Отан үшін от кешкен азаматтармен бірге М.Маметова, Ә.Молдағұлова, Қазақстан Республикасының «Халық қаһарманы» Х. Доспанова сынды батыр апаларымыздың ерлігі – бүгінгі жастардың мәңгілік есінде.
Қадірлі соғыс ардагерлері мен тыл еңбеккерлері, барша батысқазақстандықтар!
Сіздерді Ұлы Жеңіс мерекесімен құттықтай отырып, зор денсаулық, ұзақ ғұмыр, бейбіт өмір тілейміз! Бейбіт күн баянды болғай!
