«Қарашығанақ Петролеум Оперейтинг б.в.» компаниясы өңірдегі кейбір əлеуметтік жəне инфрақұрылымдық жобаларды (ƏИЖ) қаржыландырып келеді. Дəлірек айтқанда аталмыш компания ел Үкіметімен 1997 жылы жасалған ақырғы өнімді бөлісу келісіміне (АӨБК) сəйкес əрекет етеді. Құжат бойынша компания облыстық əкімдік ұсынған əлеуметтік жəне инфрақұрылымдық жобалардың жүзеге асырылуына бюджет бөледі.
Бүгін облыс әкімінің бірінші орынбасары Мұхтар Манкеев, Орал қаласының əкімі Абат Шыныбеков, аталмыш компания мен БАҚ өкілдерінің қатысуымен өткен БҚО қоғамдық кеңесінің кеңейтілген отырысында «ҚПО б.в.» есебінен қаржыландырылатын жобалар тізбесі талқыға түсті.
Кейінгі жылдары əлеуметтік жəне инфрақұрылымдық жобалардың тізбесін қоғамдық кеңестердің талқысынан өткізу тəжірибесі кеңінен қолданысқа енгенін айтқан Мұхтар Наурызбайұлы осы орайда облыстық қоғамдық кеңестің мүшелеріне азаматтық белсенділік үшін алғыс білдірді.
«ҚПО б.в.» компаниясының əлеуметтік жəне инфрақұрылымдық жобалар бойынша менеджері Ержан Əубəкіров атқарылған жұмыстарды баяндап, алдағы жоспарды таныстырды. Оның айтуынша компания тарапынан бұл мақсатқа 23 жылдың ішінде 435 млн АҚШ доллары бөлінген. Былтыр Бөкей Ордасы, Жаңақала, Теректі аудандары мен Орал қаласында білім, спорт нысандары бой көтерген. Сондай-ақ, облыс орталығындағы Мұнай базасы ауданындағы көлік өткелі мен Əлия Молдағұлова көшесін күрделі жөндеу жұмыстары да осы жоба аясында жүзеге асқан. Биыл жоспарланған жобалардың бірі — Ақжайық ауданы Тайпақ ауылы мен Бəйтерек ауданы Дариян ауылында дене шынықтыру-сауықтыру кешенін салу.
Шаһар басшысы Абат Абайұлының айтуынша, биыл Зачаган кентіндегі Орал-Атырау, Орал-Саратов шағынаудандарын абаттандыру жəне жарықтандыруға қатысты қос бірдей жоба жоспарланған. Оның аясында кентте жалпы аумағы 10 604 шаршы метр болатын аулалар абаттандырылады. Көгалдандыру жұмыстары да қатар жүреді. Автотұрақтар мен балалар ойын алаңдарын салу, су арықтарын орнату да ойластырылған. Жоба бойынша жарты шақырымнан астам автожол салынады. Жалпы ұзындығы 7 шақырымнан астам жерде 328 көше шамы орнатылады.
Облыстық қоғамдық кеңес мүшелері жобалардың маңыздылығын ескеріп, қолдау білдірді. Алайда құрылыс сапасына жіті көңіл бөліну керектігін тағы бір мəрте қаперледі. Мəселен, облыстық қоғамдық кеңестің мүшелері Бақытжан Нұрбаев пен Əлихан Досмұхамбетов ƏИЖ тізбесі бойынша салынған кейбір нысандардағы кемшілікті айтып, жауапкершілікті арттыруға шақырды. Абаттандыру жұмыстары жайлы пікір білдірген əріптесіміз Жұмажан Қожжанов көпқабатты үйлердің ауласында автотұрақтардың міндетті түрде болуын шегелеп айтты. Облыстық қоғамдық кеңестің мүшесі Бибігүл Тишанқызы компанияның қаржылай қолдауымен салынған нысандардың кепілдік мерзімін кемінде 5 жылға дейін ұзарту туралы ұсынысын жеткізді. Қоғамдық кеңес мүшелерінен бөлек ниет білдірген БАҚ өкілдеріне де толғандырған сауалын қоюға мүмкіндік берілді.
Онлайн форматта өткізілген жиынды қорытындылаған облыстық қоғамдық кеңестің төрағасы Ербол Ғұмарұлы əріптестерінің əсіресе құрылыс сапасына қатысты ұсыныс-тілегі орынды екеніне тоқталды. Ол əлеуметтік жəне инфрақұрылымдық жобалардың тізбесі бойынша құрылысы аяқталған нысандарды қабылдау комиссияларының құрамына қалалық жəне аудандық қоғамдық кеңестің өкілдерін енгізуді ұсынды. Отырыс соңында тиісті қарар қабылданды.
