Ауылдағы азаматтық қызметшілердің айлығы артады. Дəлірек айтқанда денсаулық сақтау, əлеуметтік қамсыздандыру, білім беру, мəдениет, спорт, ветеринария, орман шаруашылығы жəне ерекше қорғалатын табиғи аумақтар саласындағы мамандардың лауазымдық жалақысын жиырма бес пайызға көтеру жоспарланып отыр. Бүгін жергілікті өкілді орган шешімінің жобасы Батыс Қазақстан облысы Қоғамдық кеңесінің төралқа отырысында талқыланды.
БҚО қоғамдық кеңесінің төрағасы Ербол Ғұмарұлы ашып, жүргізген отырыста осы мəселе бойынша облыстық экономика жəне бюджеттік жоспарлау басқармасы басшысының міндетін атқарушы Нұрия Ханзадақызы хабарлама жасады. «Ауылдағы азаматтық қызметшілердің айлығын арттыру облыстық бюджет қаражаты есебінен жүргізіледі. Аталған шешім қабылданған жағдайда оның күші 2022 жылдың 1 қаңтарынан бастап туындаған қатынастарға қолданылады», — деді Нұрия Гайтпаева.
Төралқа мүшелері ауылдағы мамандардың табысын арттыруға қатысты оң пікір айтып, қолдайтынын жеткізді. Олар əсіресе көлік жүргізуші, күзетші, санитар, еден жуушы сияқты қарапайым жұмысшылардың еңбегін лайықты бағалау, жалақысын көтеру мəселесін алға тартты. Нұрия Ханзадақызы мемлекет басшысының тапсырмасымен бұл санаттағы жұмысшылардың да (кіші қызметкерлердің) айлығы жылына кем дегенде 20 пайызға көтерілетінін жеткізді.
