Облыстық Қоғамдық кеңестің отырысында БҚО мəслихатының «2022-2024 жылдарға арналған облыстық бюджет туралы» шешіміне өзгерістер енгізу туралы мəселе қаралды. Оған сəйкес облыстық қаржы басқармасының басшысы Тілепберген Каюпов хабарлама жасады.
— Өңір бюджеті 381 млрд теңгені құрайды. Қазына қаржысын 5,3 млрд теңгеге нақтылау ұсынылып отыр. Оның басым бөлігін, дәлірек айтқанда 1,6 млрд теңгесін әлеуметтік салаға бағыттау көзделді, — деді Тілепберген Ерсайұлы. Облыстық Қоғамдық кеңес мүшелері шешім жобасына қатысты сұрақтарын қойып, ой-пікір білдірді. Қазына қаржысының жұмсалуы жөніндегі мəселенің егжей-тегжейлі талқылануы үшін басқарма басшысына түсіндірме жазбаны тарқатып жазудың маңыздылығы айтылды. Сондай-ақ, қоғам қайраткері Сейітқали Меңдешевке ескерткіш орнатуға қаржы қарастыру туралы ұсыныс та отырыстың Қарарына енгізілді.
Жиында жолаушылар тасымалдау тарифіне өзгеріс енгізу мəселесі де қаралды. Осы тақырыпта хабарлама жасаған облыстық жолаушыларды тасымалдау жəне автомобиль жолдары басқармасының басшысы Айдар Менеев жолаушыларды əлеуметтік мəні бар тасымалдау түріне қатысты тариф туралы түсінік берді.
— Облыс орталығынан аудан-ауылдарға, жалпы 16 бағыт бойынша қатынайтын, мемлекет тарапынан демеуқаржы алып отырған қоғамдық көліктер туралы айтып отырмыз. Мысалы, Жәнібектен Оралға қатынау үшін қоғамдық көліктің жолақы құны 2040 теңгені құрайды. Қазіргі тариф бойынша 1 км. үшін 4 теңге төленеді. Бюджет жүктемесін азайту əрі жолаушылар тасымалымен айналысатын мердігерлерді ынталандыру мақсатында аталған тарифті 4 теңгеден 6 теңгеге көтеруді ұсынып отырмыз, — деді Айдар Қазыбекұлы.
Облыстық Қоғамдық кеңес мүшелері тариф құнын 2 теңгеге көтеру туралы ұсынысты қолдады. Дегенмен, тиісті сала басшысына жолдарды күтіп-ұстауға қатысты сын-ескертпелер айтып, тапсырысты орындаушылармен тиянақты жұмыс жүргізуді қаперге салды.
