Бүгін БҚО Қоғамдық кеңесінің отырысына қатысқан ҚР Сыбайлас жемқорлыққа қарсы іс-қимыл агенттігінің БҚО бойынша департаменті басшысының міндетін атқарушы Амантай Рашқалиев қоғам өкілдерін кесапатпен күресте күш біріктіруге шақырды.
— Былтыр мемлекет басшысы Қасым-Жомарт Кемелұлының тапсырмасымен 2022-20226 жылға арналған Сыбайлас жемқорлыққа қарсы саясат тұжырымдамасы әзірленіп, бекітілді. Бұл құжатта да уәкілетті органның, яғни біздің, өздеріңізбен, саяси партиялармен, азаматтық қоғам өкілдерімен бірлесе жұмыс істеу қажеттігі туралы нақты айтылған. Бұрын Агенттік жұмысында сандық қылмыстарды әшкерелеу жағы басым болса, бұдан былай сыбайлас жемқорлықтың салдарынан бұрын себебімен күресуге көп көңіл бөлініп отыр, — деді Амантай Елтайұлы. Ол қазірдің өзінде департаментке қарасты превенция басқармасы мен облыстық Қоғамдық кеңес жанындағы құқық қорғау органдарымен ынтымақтастық және сыбайлас жемқорлыққа қарсы іс-қимыл жөніндегі комиссияның арасында ашық әрі белсенді байланыс орнатылғанын, алда ауқымды жұмыстар күтіп тұрғанын тілге тиек етті.
— Облыстық Қоғамдық кеңес мүшелері өңірдегі өзекті мәселелерді зерттеп, басы-қасында жүреді. Сіздердің тәжірибелеріңіз бен азаматтық белсенділіктеріңіз біз үшін өте маңызды. Жуырда өңірде Сыбайлас жемқорлық тәуекелдері картасы әзірленді. Бұл құжат қоғам дертіне қатысты қордаланған мәселелерді атүсті емес, жүйелі негізде шешуге бағытталған. Осы жұмыстарда бірлесе әрекет етейік!, — деді Амантай Елтайұлы.
БҚО Қоғамдық кеңесінің төрағасы Ербол Салықов консультативтік-кеңесші, байқаушы орган сыбайлас жемқорлыққа қарсы күресте бірлесе жұмыстануға дайын екенін жеткізді.
— Біз қоғамдық бақылау іс-шаралары, атап айтқанда мемлекеттік органдар басшыларының есебін тыңдау, қоғамдық сараптама, қоғамдық бақылау және мониторингілеу тетіктері арқылы заңмен белгіленген құзыретіміз шегінде жұмыстанамыз. Біздің комиссия мен департаменттің превенция басқармасы бірлесіп, іс-шаралар жоспарын дайындаса деген ұсыныс бар. Сол жоспардан ауытқымай жұмыстансақ, оң нәтижеге қол жеткіземіз деген сенімдеміз, — деді Ербол Ғұмарұлы. Облыстық Қоғамдық кеңестің төрағасы қоғамдық бақылау іс-шараларына кеңес мүшелері ғана емес, үкіметтік емес ұйымдардың өкілдері, ниет білдірген белсенді азаматтар да атсалысатынын айтты.
Айта кетейік, осы отырыста Сыбайлас жемқорлық тәуекелдері картасы таныстырылды. Бұл туралы алдағы жазбада жарияланады.
