Президент Қасым-Жомарт Тоқаевтың төрағалығымен өткен Үкіметтің кеңейтілген отырысында келелі мәселелер қаралды.
Жиында өткен жылы атқарылған жұмыстарға тоқталған мемлекет басшысы алдағы кезеңнің басты міндеттерін айқындап берді. «Макроэкономикалық көрсеткіштермен қатар халықтың нақты табысы да қарқынды түрде артуы керек» деген Президент сөзінен бұл жолы да халықтың жағдайына басымдық берілгенін байқадық.
Сонымен бірге бюджет және салық саясатының тиімділігін барынша арттыру қажет екенін және Үкіметтің алдында бюджетті тиімді басқару, оның өлшемдерін неғұрлым дұрыс болжау да басты міндет болып қала беретінін қадап айтуында еліміздің экономикасын жаңа қарқында дамыту, адамдардың әл-ауқатын одан әрі жақсарту негізі көзделген.
Президент жиында ішкі және сыртқы инвестицияны айтарлықтай көбейтуде жаңадан үлкен міндет жүктелген Инвестициялық штаб жұмысын жақсарту, оның елге инвестиция тартуға қажетті біртұтас экожүйе қалыптастыруы керек екенін айтты. Сонымен қатар мемлекет басшысы еліміздегі өндірістің дамуына тың серпін беруді талап етті.
Тағы бір маңызды міндет – агроөнеркәсіп кешенін дамыту және су ресурстарын үнемдеп пайдалану. Ол үшін инвестициялық жобаларға бөлінетін жеңілдетілген несиені 800 миллиард теңгеге жеткізу және жеңілдікпен лизинг беруге жыл сайын кемінде 450 миллиард теңге бөлінуге тиіс екенін айтты.
Үкіметтің кеңейтілген отырысында әлеуметтік сала мәселелеріне айрықша мән берілді және денсаулық сақтау жүйесінде қордаланған мәселелер де назардан тыс қалмады.
Жиында Қасым-Жомарт Тоқаев қазіргі уақытта шешімдерді шұғыл қабылдап, әр салада сан алуан жұмыстарды атқару жолдарын айқындап берді. Осы орайда жиында айтылған инвестиция тарту, бюджет қаражатын тиімді пайдалану, мемлекеттік сатып алу, мемлекет пен жекеменшік серіктестігі, құрылыс саласын реттеу жүйесін реформалау ісін жүзеге асыруда мемлекет пен азаматтық қоғамның өзара іс-қимылын салааралық үйлестіруді жүзеге асыратын Қоғамдық кеңестер алдында да үлкен міндеттер мен жұмыстар тұрғанын сезіндік.
БҚО Қоғамдық кеңесінің төрағасы Е.Салықов
