Бұл туралы ҚР БҒМ Ғылым комитетінің философия, саясаттану және дінтану институтының бас директоры, ҚР Ұлттық ғылым академиясының академигі Серік Сейдумановтың төрағалығымен өткен жиында айтылды. «Қазақстан Республикасындағы Қоғамдық кеңестер: жетістіктер мен даму перспективалары» тақырыбында ұйымдастырылған іс-шараға БҚО қоғамдық кеңесінің төрағасы Ербол Салықов онлайн режимде қатысты.
Жиын барысында ҚР Ақпарат және қоғамдық даму министрлігі Азаматтық қоғам істері жөніндегі комитет төрағасының орынбасары Гүлбар Сұлтанова баяндама жасап, қоғамдық кеңестердің кеңейтілген құзыреті мен сапалық құрамы туралы тарқатып түсіндірді. Айтуынша, ел бойынша қоғамдық кеңестердің саны 250-ге жуықтаған. «Келер жылы қалыптасатын үшінші шақырылымның құрамы заңнамалық өзгерістерге сай әрекет ететінін ескерсек, оларға артылар жауапкершілік жүгі еселенетіні түсінікті. Бір жағынан заңдағы жаңашылдықтардың нәтижесін де сол уақытта көретін боламыз. Кезең-кезеңімен қоғамдық кеңестердің құзыреті кеңейіп келеді. Бұл – уақыт талабы. Қоғамдық кеңестердің kazkenes.kz бірыңғай ақпараттық порталының мүмкіндіктерін де молынан пайдалануымыз керек», — деді Гүлбар Бекетқызы.
Алматы қалалық қоғамдық кеңесінің төрағасы Рахман Алшанов мегаполистегі маңызды мəселелерді шешуде аталған құрылымның рөліне тоқталды. Ал Парламент Мәжілісінің депутаты Дархан Мыңбай кейбір ұйымдар мен саяси партиялар жанында жасақталған диалог алаңдарының «қоғамдық кеңестер» деп аталуы халық арасында түсініспеушілік тудыру мүмкін екенін сөз етті. «Əрине, кеңестердің көптігі демократия жолында дұрыс қадам екені сөзсіз. Дегенмен, «Қоғамдық кеңестер туралы» заңының аясында қалыптасқан консультативті-кеңесші органнан басқасын өзгеше атауға болар еді», — деді Дархан Қамзабекұлы.
Жиында Қоғамдық кеңестердің қауымдастығын құру туралы бастама көтерілді. Кезінде Парламент қабырғасында елде қоғамдық кеңестер қалыптастырып, оның жұмысын заңнамалық тұрғыда қамтамасыз етуге бастамашы болған 3 депутаттың бірі Серік Сейдумановтың бұл ұсынысы да қолдау тапты. Серік Тұрарұлының айтуынша шетелдік тəжірибеге сүйенсек, мұндай қауымдастықтар тиімділігін дəлелдеп отыр. Аталған ассоциацияға барлық аймақтық қоғамдық кеңестердің төрағалары енгізіледі. Келешекте қауымдастықтың нақты мақсат-міндеті, жоспары пысықталады. Əзірге атқару комитеті жасақталып, ұйымдастыру жұмыстарына кірісті.
