Облыстық қоғамдық кеңестің төралқа отырысында күн тәртібіндегі қос мəселеге байланысты БҚО табиғи ресурстар және табиғат пайдалануды реттеу басқармасы басшысының міндетін атқарушы Бисенғали Хайруллинның хабарламалары тыңдалды.
Төралқа мүшелері облыстық мəслихаттың «Батыс Қазақстан облысы бойынша 2019-2025 жылдарға арналған қоршаған орта сапасының нысаналы көрсеткіштерін бекіту туралы» 2019 жылғы 6 мамырдағы №23-2 шешімінің күшін жою мəселесін қарастырды. Салалық басқарма бесжылдыққа белгіленген жаңа индикаторларды Экологиялық кодекске сəйкестендіре отырып, қайта айқындайды. Айта кетейік, жыл басында қабылданған жаңа Экологиялық кодекстің күшіне енгеніне үш айға жуықтады. Жаңа құжатта қоршаған ортаға эмиссия мəселесі қарастырылған. Бұрын эмиссия үшін алынған төлемдерді табиғатты қорғау шараларына міндеттеу болмаған еді. Енді жергілікті атқарушы органдар табиғатты қорғау іс-шараларын 100 пайыз көлемінде қаржыландыруға міндетті болды. Өзгерістің бірі — заңсыз ағаш кескені үшін жауапкершіліктің күшеюі. Облыстық қоғамдық кеңестің төрағасы Ербол Салықов табиғат сақшыларын аймақ тұрғындары арасында жаңа Экологиялық кодексті ақпараттық-түсіндіру жұмыстарында белсендірек болуға шақырды. Облыстық мəслихат хатшысы Бибігүл Қонысбаева қоршаған орта сапасының нысаналы көрсеткіштеріне қатысты шешімнің жобасын алдын ала қоғамдық кеңестердің, барлық деңгейдегі мəслихат депутаттарының, үкіметтік емес ұйымдардың қатысуымен жан-жақты талқылап алуды ұсынды.
Бұдан бөлек, Батыс Қазақстан облысының жасыл екпелерді күтіп ұстау жəне қорғау қағидаларын бекіту туралы шешіміне де өзгеріс енгізіледі. Бұл мəселеге байланысты ой қосқан төралқа мүшесі Жұмажан Қожжанов қаланы көгалдандыру ісіндегі іркілістерді сөз етті. Ол отырғызылған тал-теректердің күтімі тиісті деңгейде болмай, салдарынан көп ұзамай қурап қалатынын күйіне жеткізді. «Ағаштарды отап, орнына құрылыс жүргізіп жатқан компаниялар жасыл желектің өтемін қалай қайтарып жатыр? Жауапкершілік қарастырылған ба? Ал тамыр жаймаған көшеттерге кім жауап береді? Əлде олар тек есептегі белгі үшін егіле ме?», деп жанайқайын жеткізді Жұмажан Қожжанұлы.
Отырысты қорытындылаған Ербол Ғұмарұлы облыстық табиғи ресурстар және табиғат пайдалануды реттеу басқармасының басшылығын айтылған ұсыныс-тілектерге байланысты өзге де жауапты басқарма-ұйымдармен бірлесе отырып, жүйелі жұмыстануға шақырды.
