БҚО қоғамдық кеңесінің төралқа отырысында «Спорт түрлері бойынша ҚР құрама командаларының (ұлттық құрама командалардың) құрамына кіретін спортшыларға, сондай-ақ спорттың ойналатын түрлері бойынша ҚР құрама командаларының (ұлттық құрама командалардың) құрамында қатысатын спортшыларға ай сайынғы ақшалай жабдықталым төлемдерінің мөлшерін бекіту туралы» қаулы жобасы талқыланды. Жобаны әзірлеуші орган – Батыс Қазақстан облысының дене шынықтыру және спорт басқармасы. Аталған сала басшысының орынбасары Жеңіс Нығметуллиннің нақтылағанындай, қаулы жобасында спортшылар мен олардың жаттықтырушыларына тағайындалған стипендия мөлшерін қысқарту қарастырылып отыр. «Біз республиканың өзге өңірлерінде спортшыларға төлем жүргізілетін жарыстардың деңгейі мен жүлделі орындарға сараптама жасадық. Біздің облыс пен Қарағандыны қоспағанда, басқа аймақтар ішкі чемпионат жүлдегерлерін ішінара қаржыландыратыны белгілі болды. Мысалы, жасөспірімдер арасында ел чемпионатының жүлдегерлеріне жоғарыда аталған екі өңірден басқасында мүлдем төлем қарастырылмаған. Ал жастар арасындағы ел чемпионаты жүлдегерлерінің барлығына бірдей айлық төлем тағайындалмаған. Мәселен, Павлодар мен Ақтөбе облысында жастар арасындағы ішкі чемпионатта тек 1 орын алғандарға ғана стипендия беріледі. Біз осы тәжірибені енгізгіміз келеді. Сондай-ақ, жаттықтырушыларға әр спортшы жетістігінің 10% көлемінде ақы төлеу (қазір 20%) жоспарланды. Бұл өзгеріс бір жағынан бюджет қаражатын үнемдеуге бағытталып отыр», — деді Жеңіс Махамбетұлы.
Қаулы жобасымен алдын ала танысқан төралқа мүшелері отырыс барысында бірқатар сауал жолдап, ой-пікірін білдірді. Облыстық мәслихат хатшысы Бибігүл Қонысбаеваның ойынша қаулы жобасындағы өзгерістердің негіздемесі түсініксіз. «Төрт жыл бойы төленіп келген стипендияның мөлшерін қысқарту немесе мүлдем тоқтатып тастау есебінен бюджетті үнемдеуге ұмтылу орынды деп ойламаймын. Бұл жағдайда спортшылар мен жаттықтырушылардың да көңіл-күйін түсінуге болады. Өзге облыстардағы жағдайды күні бұрын сараптап, екшеп алу керек еді. Мүмкін, төлем мөлшерінен бұрын төлем шарттарына өзгеріс енгізу керек шығар», — деді Бибігүл Тишанқызы.
Төралқа мүшелері спортшыларды ынталандыру жұмыстары жүйелі жалғасу қажеттігін қаперге салды. Олар қаулы жобасына қарсылық танытып, бұрынғы күйінде қалдыруды қолдады.
«Біз бұдан төрт жыл бұрын спортшыларға стипендия тағайындау бастамасын қолдауымыздың басты себебі елдің жастары ынталанса, байрақты бәсекелерде өңірдің, елдің намысын қорғап, жеңіске деген құлшынысын арттырса екен дедік. Сол ойымыз өзгеріссіз қалады. Кейбір спортшылар ішкі чемпионаттардағы жетістікпен шектеліп, алға қарай ұмтылмайды деген пікірмен келісе алмаймын. Стипендия мөлшері жарыстардың деңгейіне байланысты реттеледі ғой, қай спортшы болмасын айлық төлемін арттырғанын, жалпы ел абыройын асырғанды қалайтыны анық. Қорыта айтқанда, қоғамдық кеңес өз құзыреті аясында шешім қабылдап отыр. Төралқа мүшелерінің басым дауысымен біз қаулы жобасын қабылдауға қарсымыз», — деді отырысты қорытындылаған БҚО қоғамдық кеңесінің төрағасы Ербол Ғұмарұлы.
Айта кетейік, қаулы жобасы Ашық нормативтік құқықтық актілердің интернет-порталында орналастырылған. Көпшілік талқылау мерзімі 15 қарашаға дейін жалғасады.
