Батыс Қазақстан облыстық Қоғамдық кеңесінің отырысы оздырылды. Кеңес отырысын төраға Ербол Салықов жүргізді. Кеңеске облыс әкімінің орынбасары Тілепберген Каюпов, облыстық Қоғамдық кеңестің 21 мүшесі, облыстық басқарма басшылары, БАҚ және азаматтық қоғам өкілдері қатысты.
Күн тәртібінде төрт мәселе қаралды, алдымен «Батыс Қазақстан облыстық мәслихатының 2023 жылғы 14 желтоқсандағы «2024-2026 жылдарға арналған облыстық бюджет туралы» шешіміне өзгерістер енгізу туралы» мәселе бойынша облыстық қаржы басқармасының басшысы Нұрлан Есенғалиев хабарлама жасады. Басқарма басшысы хабарламасында облыстық бюджет көлемі осы кезеңге 504,3 млрд. теңге құраса, 11,1 млрд. көлемінде кірістердің ұлғаюуына байланысты 515,4 млрд. теңгеге нақтыланғанын жеткізді.
Осы өзгерістерге сай әлеуметтік сала шығыстарына 3,3 млрд. теңге, соның ішінде 1,2млрд. білім беру, денсаулық сақтау, мәдениет және спорт ұйымдарының ағымдағы шығыстары және материалдық-техникалық жабдықтауға, 1млрд.теңге 20 денсаулық сақтау нысандары мен құрылысын жалғастыруға, 543,3 млн.теңге Теректі ауданының аудандық емхана құрылысын аяқтауға және «Казталов аудандық ауруханасы» МКК тоңазытқыш жабдығы бар мәйітханаға арналған модульдік конструкция ғимаратын сатып алуға, облыстық мерзімді баспа басылымдарында (газеттерде) және республикалық интернет-ресурстарда ақпараттық материалдарды дайындау және орналастыруға, бағытталғанын жеткізді.
Тұрғын үй-коммунальдық шаруашылық саласы шығыстарына 2,6 млрд.теңге бөлуге, Көлік және коммуникация саласы шығыстарына 2,5 млрд. теңге Жаңақала, Жәнібек, Теректі, Бөкей ордасы, Казталов, Ақжайық және Бәйтерек аудандарының аутожолдарын күрделі, орташа жөндеуді жалғастыру және аяқтауға жоспарланғанын жеткізді.
Қоғамдық кеңес мүшелері Азамат Мусилов, Мақсот Берген, Айгул Есекенова, Искендир Илимисов, Мағауия Есмагулов, Нұрлан Сәдір «2024-2026 жылдарға арналған облыстық бюджет туралы» шешіміне өзгерістер енгізу туралы» мәселені талқылауға белсене қатысып, өз ұсыныстарын ортаға салды.
Мәселе бойынша Кеңес мүшелері нақты сұрақтар қойып, хабарламашы Н.Есенғалиев және кейбір сұрақтарды облыс әкімінің орынбасары Т.Каюпов түсіндіріп берді. Облыстық бюджетке ұсынылған өзгерістер Кеңес мүшелерінің ұсыныстарымен толық қабылданды.
Екінші мәселе Батыс Қазақстан облысы әкімдігінің 2022 жылғы 18 ақпандағы «Батыс Қазақстан облысының ауыз-сумен жабдықтаудың баламасыз көздері болып табылатын сумен жабдықтаудың ерекше маңызды оқшау жүйелерінің тізбесін бекіту туралы» қаулысына өзгеріс енгізу туралы облыстық энергетика және тұрғын үй-коммуналдық шаруашылық басқармасының басшысы Мирас Мүлкәйдің қаулыға өзгеріс енгізу туралы ұсынысын кеңес мүшелері қолдады.
Келесі, Батыс Қазақстан облысының мәдениет, тілдерді дамыту және архив ісі басқармасында мемлекеттік көрсетілетін қызметтердің сапасы бойынша басқарма есебі туралы облыстық мәдениет, тілдерді дамыту және архив ісі басқармасының басшысы Қуанышбек Мұханғалиев хабарлама жасады. Кеңес мүшелері өңірде мемлекеттік тілді дамытуда әсіресе Орал қаласындағы жарнамалар, мекеме атаулары т.б.жұмыстарына, ескерткіш қою немесе алып тастау жөнінде кейбір мәселелерге тоқталып, ұсыныстарымен басқарма есебі мақұлданды.
Батыс Қазақстан облысының жұмыспен қамтуды үйлестіру және әлеуметтік бағдарламалар басқармасында мемлекеттік көрсетілетін қызметтердің сапасы бойынша басқарма есебі туралы облыстық жұмыспен қамтуды үйлестіру және әлеуметтік бағдарламалар басқармасының басшысы Бақберген Абуов хабарлама жасады. Басқарманың мемлекеттік қызметтің екі түрін көрсететінін, «Жұмыс берушілерге шетелдік жұмыс күшін тартуға рұқсат беру және ұзарту» және «Қандас мәртебесін беру немесе ұзарту» бағытында жүйелі жұмыстар жүргізілгенін жеткізді. Басқарманың жұмысына жан-жақты тоқталды.
Күн тәртібіндегі барлық мәселелер қаралып, тиісті қарар қабылданды.
