Қоғамдық кеңестің кеңейтілген отырысында Батыс Қазақстан облысының аумағын дамытудың 2021-2025 жылдарға арналған бағдарламасының жобасы талқыға түсті. Күн тəртібіндегі мəселе бойынша баяндама жасаған облыстық экономика және бюджеттік жоспарлау басқармасы басшысының орынбасары Əсемгүл Əбенова межеленген мерзімге дейін жоспарланған жұмыстардың ауқымды тұстарына тоқталды. Өңірдің экономикалық өсімін қамтамасыз ету, ауыл шаруашылығын əртараптандыру, инвестициялық əлеуетті арттыру, инфрақұрылымды дамыту, жалпы барлық салаға қатысты негізгі көрсеткіштер айқындалған.
Баяндамадан соң Казталов аудандық қоғамдық кеңесінің төрағасы Мағауия Сансызбайұлы ең алдымен аймақты көгілдір отынмен, ауыз сумен толық қамтамасыз етудің барлық мүмкіндігін қарастыру қажеттігіне назар аудартты. Əріптесіміз республикалық жəне облыстық маңызы бар жолдардың құрылыс қарқынын арттыру, сондай-ақ қыстыгүні автожолдардағы апаттың алдын алу мақсатында күтіп-ұстау жұмыстарына жіті көңіл бөлуді сұрады.
Тұрғын үйге жоғары кезектілік — өңір үшін көкейтесті мəселенің бірі. Əріптесіміз Жұмажан Қожжанов тұрғын үй мəселесін шешудің тиімді тетіктерін ойластырып, бұл бағытта жұмысты бір сəтте де бəсеңдетпеуді қаперледі. Ал, Жаңақала аудандық қоғамдық кеңесінің төрағасы Əлихан Досмұхамбетовты экологиялық ахуал алаңдатты. Бесжылдық бағдарламада қатты тұрмыстық қалдықтарды қайта өңдеу саласына жіті көңіл бөлінген. Қалдықтарды кəдеге жаратудың қажеттігімен келіскен Əлихан Декартұлы экологиялық мəселені шешудің өзге де жолдарына назар аудартты. Əріптесіміз кейінгі жылдары Жайық өзені деңгейінің күрт төмендеуі, өзен-көлдердің тартылуы, құрғақшылық салдарынан топырақ-өсімдік жамылғысының өзгеріске ұшырауы сияқты күрделі мəселелерді шешу жолдары тиісті деңгейде қамтылмағанына қынжылды. Қоғамдық кеңес мүшелері бұл мəселенің өңір үшін өзектілігін ескеріп, суландыру жүйесіне қатысты нақты ұсыныстарын жеткізді. Сондай-ақ, бағдарлама аясында қойылған сауалдарына жауап алды.
Облыстық қоғамдық кеңестің төрағасы Ербол Салықов аумақты дамыту бағдарламасында ауқымды жоспар түзілгенін, оның бəрі өңірді одан əрі өркендету жолындағы жарқын істер болатынына сенім білдірді. Сондай-ақ, кейбір мəселелерге қатысты əлі де терең талдаудың қажеттігіне тоқталды. Əсіресе, аймақтағы электр желілерін кезең-кезеңмен жаңғырту, салалар жаппай цифрланып жатқан «онлайн өмірде» уақыт талабына сай ауыл-елдімекендерді жылдамдығы жоғары интернетпен қамтамасыз ету мəселелеріне екпін түсірді. Былтыр Ақжайық, Тасқала аудандарының халқы ұжымдық бау-бақша егу бағытында үлгілі үрдіс жасағанын айтқан Ербол Ғұмарұлы ел-жұртты еңбекке баулудың, ынталандырудың маңыздылығына тоқталды. Кейінгі жылдары жеке секторда мал ұстау, құс өсірудің көңіл көншітпейтінін, ауыл адамдарының біразы дүкеннің сүт-қаймағын тұтынып отырғанын сөз етті. Осы бағытта жан-жақты жұмыс жүргізілсе деген өтінішін жеткізді.
Айта кетейік, қоғамдық кеңес мүшелері тарапынан айтылған ұсыныстар хатталып, бесжылдық бағдарламаға енгізілмек.
